ليلى غفران تكشف أسرار فى مقتل إبنتها

ليلى غفران تكشف أسرار جديدة بعد40يوم على قتل ابنتها !!!



كانت الفنانة ليلى غفران ضيفة على برنامج القاهرة اليوم بمناسبة ذكرى الأربعين لوفاة ابنتها هبة العقاد والتى قتلت هى وصديقتها نادين خالد فى شقة بمدينة الشيخ زايد ، وأحيل المتهم بقتلهما إلى محكمة الجنايات

سألها عمرو فى البداية عما تريد قوله ؟

قالت : كل اللى حصل ده والضجيج فى الشارع ومع الناس اتعمل علشان ليلى غفران ، وأنا باقول لو ده حصل مع أى حد فى الشارع مهما كان لن يتعرض لما تعرضت له
حرام بنتين يروحوا بالطريقة دى
أنا عمرى ماكنت باقرا صفحة الحوادث ودلوقتى باكتشف كل يوم جرايم أكثر وأبشع من جريمة قتل بنتى

سالها : ايه مشكلتك مع جوز بنتك؟

كان ابنى اللى ماخلفتوش وواحد من العيلة لأن هبة كانت بتحبه

سألها عزت ابو عوف : هل ماكنتيش موافقة عليه ؟

نفت ليلى

فسألها عمرو هل شكت فى زوج ابنتها أن يكون قتل هبة ؟

قالت ليلى : على عاش معانا سنة ونص فى البيت وكان إنسان جميل ومهذب وكنا عيلة وكان فيه تلاحم كبير ، فى الفترة الأخيرة حصل خناق ، وده اللى استوقفنى وفجأة اتخانقوا وجاب هبة من شعرها للسلم للأرض ويضربها ضرب شديد ، جالى هيستيريا وهو مكنشى كده
مشاعرى لم تتغير تجاهه رغم ذلك ، والخناقة لم تكن بسيطة ومش معقول اتخانق مع حد كده علشان الأكل ده ضربها بشكل هيستيرى
ده كان قبل وفاتها باسبوع
قمت أجرى لقيت هبه قاعده برة فى الروف وبترتعش قلتلها مالك قالتلى على اتجنن ، رحت اشوفه لقيته مشى وخد كل هدومه وخد باسبورها وعقد الشقة

وحول شكوكها فى على قالت : فى الأول كان عندى شك كبير والشك جالى من ردود فعله لما اتخانق معاها وهو ماخدشى هدومه بس لكن خد ورق يتعلق بيها
يوم ما كنا فى العزا قلت لجوزى أن على لما يعرف أن هبة اتوفت أكيد هيعمل فى نفسه حاجة
على وقف فى العزا مع الناس وعيط وفجأة طلب منى مفتاح الأوضة اديتهاله وعرفت انه دخل خد مجوهرات من جوة ، وأوراق ونزل عربيته حطهم فيها وقفل العربية ورجع ولا كأن فيه حاجة خالص
أنا بدأت اجمع النقط دى وشكيت فيه

ثم نفت ليلى ما نشر على لسانها عن اتهامها لأبناء رجال أعمال ،وقالت أنها لم تتكلم لأى جريدة إلا الوفد من أسبوعين لأن حالتى لم تكن تسمح لى بالكلام

سألها : هل مقتنعه بان المتهم هو القاتل فقالت طبعا لكن ارجع وأقول فيه حد معاه ، أنا حاسة أن هو القاتل ، لكن فيه حد معاه

سأل عزت أبو عوف : ليه الإحساس العام أن فيه حد تانى ؟

قالت ليلى : أول شئ قالوا أن فيه آثار لشخصين مش شخص واحد ( آثار أقدام ) وكمان فيه آلتين للجريمة السكينة والعتلة ، ودم كل واحدة منهم على آلة
ده مش مفهوم ازاى يستعمل الاتنين

** فكرة محرض هى الأقرب أم إنهم مجرد لصوص ؟

- موضوع السرقة مش وارد والبيت كان مليان مجوهرات والحاجة كلها موجودة


أضاف حسن أبو العينين محامى ليلى غفران : سبب السرقة غير منطقى حتى الآن ونحن لم نجد سبب للقتل ، المتهم هو الفاعل الأصلى والحقيقى لكن هناك الغاز
هبة لاتبات خارج البيت من حوالى 3 سنين ودى أول مرة تعملها !!!

جارتهم قالت أن كان فيه ولد وبنت بيتخانقوا قبل الحادث على طول
وفين البصمات فى مسرح الجريمة أو على أداة الجريمة ،ولا بصمة للولد رغم انه استخبى وقعد فترة طويلة

** ومن له مصلحة فى القتل ؟ هل نادين لها أعداء أو هبة ؟

- الله اعلم

** ليه اتهمت على ؟

رد المحامى : الشك جاء لما اطلعنا على التحقيقات وأقوال على قال أنها كلمته فى التليفون ، فى أقوال المتهم قال انه خد تليفون هبة ووقع منى هو والسكينة وأنا بانط من على السور ، كيف يمكن لهبة أن تكلم على فى التليفون إذا كان المتهم قال انه خد التليفون ووقع منه
هو خد التليفونين واحد وقع من على السور والتانى باعه

ومن هنا جاءت الشكوك ، محمود ارتكب الجريمة لكن عدم وجود البصمات يفتح الباب للتساؤل ، ولكننا سنطالب من أول جلسة بإنزال اقصى العقوبة على المتهم وهى الإعدام

** انتى دلوقتى شايفة ايه ؟

- هو القاتل ( المتهم ) لكن فيه شخص محرض ماعرفشى هو مين ...لو عرفته أنا أول واحدة اقتله ، أنا باموت كل يوم ومش عارفة أنام ، أنا مقتنعه انه القاتل

قال عمرو أديب : عندى معلومة أن هناك محامى لهذا الشاب كان مقتنع أن العيساوى برئ وقرر الدفاع عنه ، ولما اعترف له انه القاتل تنحى وراح لجهات التحقيق قال لها المعلومة دى